Unnendur ljóða geta aldeilis tekið gleði sína í jólabókaflóðinu en að vanda kemur fjöldi vandaðra ljóðabóka út eftir íslenska höfunda. Á vegum Forlagsins koma eftirfarandi bækur út, sem eru allar komnar í verslanir og tilvalið að lesa hugljúf ljóð í aðdraganda jóla.
Ég hugsa mig – Anton Helgi Jónsson
Ég hugsa mig er ellefta frumsamda ljóðabók Antons Helga. Bókin kemur út á hálfrar aldar höfundarafmæli hans, en það var árið 1974 sem hann kvaddi sér fyrst hljóðs með ljóðabókinni Undir regnboga. Myndirnar í bókinni gerði Sossa sérstaklega fyrir þessa útgáfu en þau Anton hafa unnið saman að margvíslegum verkefnum þar sem ljóð og myndlist mætast.
Jarðljós – Gerður Kristný
Innbundin ljóðabók eftir eitt af okkar helstu skáldum. Gerður Kristný nýtur aðdáunar fyrir orðsnilld sína langt út fyrir landsteinana og við ljóð hennar hafa innlendir og erlendir listamenn samið tón- og leikverk. Hún hefur hlotið margs konar viðurkenningar fyrir skrif sín, þar á meðal Íslensku bókmenntaverðlaunin, Verðlaun Jónasar Hallgrímssonar og Ljóðaverðlaun Guðmundar Böðvarssonar og Ingibjargar Sigurðardóttur. Jarðljós er tíunda ljóðabók hennar en sú fyrsta, Ísfrétt, kom út fyrir réttum þrjátíu árum.
Safnið – ljóð Lindu Vilhjálmsdóttur
Þessi bók geymir safn allra útgefinna ljóðabóka Lindu, en sú fyrsta, Bláþráður, kom út 1990. Linda hefur hlotið mikið og verðskuldað lof fyrir ljóð sín sem eru meitluð og áhrifarík, oft pólitísk og beitt. Inngangsorð bókarinnar skrifar Kristín Eiríksdóttir skáld og í bókarlok er viðtal Hauks Ingvarssonar, bókmenntafræðings og skálds, við Lindu þar sem hún segir frá uppvexti sínum og ævi, skáldskap og skoðunum. Ýmis verðlaun og viðurkenningar hafa fallið Lindu í skaut fyrir ljóðabækur hennar, ekki síst Frelsi, en fyrir hana var hún tilnefnd til Bókmenntaverðlauna Norðurlandaráðs og hlaut bæði Menningarverðlaun DV og Verðlaun starfsfólks bókaverslana. Ljóð hennar hafa birst í erlendum þýðingum í safnritum og víðar.
Ég er það sem ég sef – Svikaskáld
Svikaskáld skipa Fríða Ísberg, Melkorka Ólafsdóttir, Ragnheiður Harpa Leifsdóttir, Sunna Dís Másdóttir, Þóra Hjörleifsdóttir og Þórdís Helgadóttir. Ég er það sem ég sef er fimmta verkið sem þær gefa út saman en áður hafa þær sent frá sér ljóðabækurnar Ég er ekki að rétta upp hönd (2017), Ég er fagnaðarsöngur (2018) og Nú sker ég netin mín (2019) auk skáldsögunnar Olíu (2021) en hún var tilnefnd til Íslensku bókmenntaverðlaunanna. Galsafengin og margræð ljóðabók um bugun og nýjar víddir, stiga sem ögra náttúrulögmálum, konur sem hringlar í og niðurföll sem soga til sín lífið sjálft.
Söngvar til sársaukans – Valdimar Tómasson
Valdimar Tómasson er íslenskum bókmenntaunnendum að góðu kunnur fyrir meitluð og harmþrungin ljóð sín. Söngvar til sársaukans er sjöunda ljóðabók hans en hér yrkir hann um friðlausa auðn, þungbærar tilfinningar og vonarglætuna sem smýgur í gegnum svartnættið.
Flaumgosar – Sigurbjörg Þrastardóttir
Í ljóðabókinni Flaumgosum mætast náttúran, þjóðsögur, sveitin og raunveruleiki miðaldra kvenna á leikandi og stundum galsafenginn hátt. Bókin kemur út á aldarfjórðungs höfundarafmæli Sigurbjargar, en fyrsta bók hennar, Blálogaland, kom út árið 1999.
Föðurráð – Bubbi Morthens
Þjóðin hefur þekkt og dáð söngvaskáldið Bubba Morthens í áratugi. Hann hefur fært okkur einlægustu ástarljóð jafnt sem beittustu ádeilur og skörpustu sjálfgagnrýni. Ljóðabækurnar hans eru sterkar og grípandi. Föðurráð er hans sjötta ljóðabók.
