Orkuskorturinn nú og tugmilljarðatjón þjóðarinnar vegna hans er á ábyrgð Samfylkingarinnar, sem lengi hefur haldið því fram að enginn skortur sé á orku hér á landi. Samfylkingin er popúlískur flokkur og stefnubreytingin í orkumálum nú er vegna þess að flokkurinn er kominn upp að vegg. Jón Gunnarsson, þingmaður Sjálfstæðisflokksins, er gestur Ólafs Arnarsonar í hlaðvarpi Eyjunnar.

Hlýða má á brot úr þættinum hér:

Eyjan - Jon Gunnarsson - 3

„Við eigum mikil tækifæri til framleiðsluaukningar. Við þurfum náttúrlega að koma okkur úr þessum sporum- úr þessari stöðnun í orkumálum sem hefur verið. Við höfum verið að stíga ákveðin skref núna á þessu kjörtímabili, vissulega, en það er engan veginn fullnægjandi,“ segir Jón.

Hann segir pólitíska ágreininginn í þessum málum vera allt of mikinn. „Þetta er orðið tugmilljarða tjón fyrir þjóðina núna á hverju einasta ári. Við erum núna til að mynda, út af bara stöðunni hjá Landsvirkjun í vatnsmiðlunarlónunum, þá sagði nú einn við mig, reiknimeistari, um daginn að þetta yrði líklega tap í útflutningstekjum upp á 30-40 milljarða. Ef slíkt gerðist t.d. í sjávarútveginum þá teldist það aflabrestur og gríðarlegt áfall fyrir þjóðarbúið. En það er ekki minnst á þetta af því að þetta er í rafmagninu, sem margir flokkar á þingi hafa staðið algerlega gegn því að við höldum áfram …“

Og sérstaklega náttúrleg samstarfsflokkur ykkar í ríkisstjórn …

„Og Samfylkingin. Ég get bara sagt þér að þegar ég var formaður atvinnuveganefndar 2013-16 …“

Samfylkingin hefur lýst nýrri stefnu í þeim málaflokki …

„„Hún getur lýst öllu – svona popúlískir flokkar gera það þegar þeir eru komnir upp að vegg. En það er ekki lengra síðan en 2015-16 að þeirra þingmenn sögðu við mig: Jón, láttu ekki svona, það er alveg næg orka. Þarna var ég að reyna að koma rammaáætlun í gegn; fimm til átta virkjanakostum í vatnsafli sem yrðu svona uppbygging næstu 15 árin, eitthvað svoleiðis. Ég var stoppaður með það Framsókn brást svolítið, það veður að segjast alveg eins og er, undir forystu Sigmundar Davíðs á þeim tíma. Það muna margir eftir þessum slag. Mér var úthúðað í þinginu, menn töluðu um Jón á jarðýtunni. Ég sagði við fólk: Áttið þið ykkur ekki á veggnum sem er fyrir framan okkur í orkumálum. Það var alveg fyrirsjáanlegt hjá öllum sem kynntu sér þetta,“ segir Jón.

Jón nefnir sérstaklega Bjarna Bjarnason, þáverandi forstjóra Orkuveitunnar, sem hann minnir á að hafi starfað sérstaklega í umboði Samfylkingarinnar í Reykjavík og þeirra flokka sem störfuðu með henni. „Hann kom hér, alveg þar til fyrir einu og hálfu til tveimur árum, fram og sagði við þjóðina stöðugt – forstjóri þessa stóra orkufyrirtækis – að það væri sko alveg nóg orka á Íslandi, sko.“

Þær yfirlýsingar komu mjög á óvart. Þær eru allavega ankannalegar.

„Þær voru bara í mörg ár. Það er meðal annars vegna þess að undir forystu Samfylkingarinnar var sett á framkvæmdastopp hjá þessu fyrirtæki í virkjunum. Hann bara spilaði með og var kannski höfundurinn að því, ég veit það ekki. Þannig að ræturnar að þessum orkuskorti og tugmilljarðatjóni þjóðarinnar í dag liggja þarna.“

Hægt er að hlusta á hlaðvarpið í heild sinni hér: