Luis Enrique myndi taka á sig 50 prósent launalækkun til að sleppa við það að tala við blaðamenn í Frakklandi.

Enrique er þjálfari Paris Saint-Germain en eins og aðrir kollegar hans þá þarf hann að ræða við blaðamenn fyrir og eftir leiki.

Spánverjinn segist njóta þess að tala við blaðamenn en er samt sem áður til í að taka á sig gríðarlega launalækkun til að sleppa við ákveðin viðtöl.

Enrique er að sjálfsögðu á frábærum launum í Frakklandi en PSG er eitt allra ríkasta félag heims.

,,Ég skemmti mér á meðal ykkar og á í góðu sambandi við flesta blaðamenn,“ sagði Enrique við blaðamenn.

,,Ég hef aldrei yfirgefið blaðamannafund snemma. Hins vegar ef þið mynduð afhenta mér blað þar sem ég myndi gefa frá mér 25 prósent eða jafnvel 50 prósent af laununum til að sleppa við fjölmiðla þá myndi ég skrifa undir.“

,,Það er þó ekki möguleiki því í samningum þjálfara þá kemur fram að það sé þeirra skylda að tjá sig opinberlega.“

,,Ég nýt þess að tjá mig en myndi sleppa því ef ég kæmist hjá því – sérstaklega eftir leiki þegar ég er orkulaus.“