Breska hljómsveitin Oasis mun koma aftur saman og fara í tónleikaferðalag á næsta ári. Nú hefur söngvari sveitarinnar, hinn orðvari og geðþekki Liam Gallagher gefið því undir fótinn að Oasis verði með í hálfleikssýningunni á úrslitaleik NFL-deildarinnar í amerískum fótbolta, Super Bowl. Leikurinn fer fram í febrúar á næsta ári og sá möguleiki að Oasis muni láta ljós sitt skína þar hefur gert aðdáendur sveitarinnar enn spenntari fyrir endurkomunnni en miðar á tónleika sveitarinnar hafa selst mun hraðar en raunin hefur nokkurn tímann verið með heitar lummur.
Mirror greinir frá en þar kemur fram að þær sögur gangi fjöllum hærra að Oasis verði sérstakir gestir í atriði rapparans Kendrick Lamar en gefið hefur verið út að hann verði í fyrrirúmi í hálfleikssýningunni.
Meintum lagalista Lamar var lekið en á honum kemur að sögn fram að Oasis taki þátt. Þessi leki setti allt í uppnám í netheimum meðal spenntra aðdáenda sveitarinnar.
Á listanum kemur fram að meðal annars muni Lamar flytja lag Oasis Rock N´Roll Star ásamt sveitinni. Listinn var birtur á samfélagsmiðlinum X. Í athugasemd við myndina skrifaði Liam Gallagher:
„Hvernig í andskotanum var þessu lekið.“
Þessi orð hans settu spenning aðdáenda í yfirsnúning. Það hefur hins vegar ekki fengist staðfest hvort þessi listi er raunverulegur og söngvarinn hvorki játaði né neitaði því á X að svo væri.
Aðdáendur beindu orðum sínum að Gallagher á X og sögðust afar spenntir fyrir samstarfi Kendrick Lamar og Oasis. Einn aðili birti myndir af rapparanum á sviði íklæddur Oasis bol. Aðdáendur spurðu söngvarann beint á X hvort þessi listi væri raunverulegur og hvort að Oasis verði virkilega með í þessum stóra og mikla viðburði, hann svaraði hins vegar ekki.
Til stendur að Oasis haldi röð tónleika í Bretlandi og á Írlandi næsta sumar. Liam Gallagher var einnig spurður á X hvort stæði til að sveitin myndi lengja endurfundina fram yfir það og svaraði:
„Hver veit?“
Þetta svar gerði marga aðdáendur enn spenntari en sumir vildu þó fá skýrari svör:
„Hvað meinarðu, Liam?“
