Það þarf að skipta um hugmyndafræði hjá Seðlabankanum, annars verður ekki hægt að lækka vexti hér á landi. Nú er svo komið að 30 milljónir af kostnaði við 100 milljóna íbúð er fjármagnskostnaður. Á meðan íslenska krónan er hér og verðtrygging felur verðbólgan afleiðingar agalausrar hagstjórnar en byrðarnar lenda alltaf á skuldugum almúganum áður en yfir lýkur. Breki Karlsson, formaður Neytendasamtakanna, er gestur Ólafs Arnarsonar í hlaðvarpi Markaðarins á Eyjunni.

Hlýða má á brot úr þættinum hér:

Markaðurinn - Breki Karlsson - 5.mp4

„Það tekur svona u.þ.b. þrjú ár að byggja blokk og byggingarverktakinn tekur lán eða leggur til eigið fé og þarf að fá ávöxtun á það í samræmi við kröfur eigenda. Allt að 30 prósent af verði 100 milljón króna eignar, 30 milljónir, er fjármagnskostnaður þannig að það kostar ekki „nema“ 70 milljónir að byggja 100 milljóna króna íbúð og 30 prósent af upphæðinni er fjármagnskostnaður. Þetta er galið,“ segir Breki.

Hann segir að á meðan mikil þörf er á nýjum íbúðum á næstu árum sé óhugsandi að ná niður vöxtum með ríkjandi hugmyndafræði Seðlabankans. Til að hægt sé að lækka vexti þurfi að skipta um hugmyndafræði.

Já, maður kemur alltaf að þessari örmynt sem við notum og því agaleysi sem henni fylgir. Hagstjórn á Íslandi er í molum og ráðamenn geta reynt að telja okkur trú um annað en þeir vita betur og við vitum betur.

Ekki breytist allt á einni nóttu við að taka upp annan gjaldmiðil en þá yrðu afleiðingar óstjórnar miklu alvarlegri.

„Já, og sýnilegar. Verðbólgan maskar út syndirnar, það eru ekki beinar afleiðingar gjörðanna en byrðarnar lenda samt sem áður á hinum skuldandi almúga.“

Hægt er að hlusta á hlaðvarpið í heild sinni hér: