Árbær vann leikinn, sem var liður í 16-liða úrslitum Fótbolti.net bikarsins, bikarkeppni neðri deilda, 3-2 en Baldvin var spjaldaður í leiknum fyrir að mótmæla. Það var hann ekki sáttur við.
„Það má bara ekkert segja við þessa gauka sem eru að dæma þessa leiki hjá okkur. Leikmaður númer 6 hjá Víking Ólafsvík var búinn að brjóta endalaust, hann var meira að segja nýbúinn að labba upp að mér og slá mig í andlitið. Þeir voru ekki að spjalda rassgat á Víking Ólafsvík. Mér fannst dómgæslan ekkert æðisleg í leiknum. Gary Martin var endalaust rífandi í menn, ég var nú að spá í að labba inn í klefa með treyju fyrir hann fyrst hann að var rífandi í menn allan helvítis fyrri hálfleikinn áður en hann var tekinn útaf.
Mér fannst hann (Gary Martin) fá of mikla virðingu í dag og sama með Víking Ólafsvík sem stóra liðið í dag innan gæsalappa. Um leið og ég bað um eitthvað eitt spjald sem var bara pjúra spjald þá spjalda þeir mig bara. Það er auðvelt að spjalda unga þjálfara virðist vera,“ sagði Baldvin í samtali við Fótbolta.net eftir leik.
Viðstaddir á leiknum létu hins vegar sumir hverjir í sér heyra um málið í athugasemdakerfi miðilsins. Vildu þessir netverjar meina að Baldvin hefði ekki sagt alla söguna.
„Þetta er nú meira ruglið sem kemur útúr þessum manni. Ég var á vellinum. Ég hef aldrei séð lið sem öskrar eins mikið og liðið hans, að manni varð illt í eyranu og þetta var vandræðalegt að horfa uppá þetta.. Þeir voru ekki að heilla mig. Þeir ættu að breyta nafninu úr Árbær í Öskuraparnir. Dómarinn var fínn og dæmdi meira á þá þar sem þeir voru sífellt að brjóta af sér. En þeir þurfa hugsanlega að fara austur á firði í næsta leik en við þurfum ekki að hafa áhyggjur af því,“ skrifaði einn og fleiri tóku til máls.
„Þjálfarinn hjá Árbæ tók boltann þegar hann fór út af og neitaði að láta leikmann numer 6 fá boltann og hélt honum fyrir aftan bak. Á þessu augnabliki var þjalfarinn á gulu spjaldi og var ítrekað búið að aðvara hann. Fyrir það að neita að láta leikmann fá boltann og halda honum fyrir aftan bak átti þessi þjalfari að fá rautt spjald og fara beinustu leið út af vellinum. Framkoma hans við dómara leiksins og leikmenn Víkings var til skammar.“
Árbær spilar í 3. deild en Víkingur Ó. deild ofar. Það var því vel af sér vikið að slá Ólsara úr leik.
