Íþróttafréttamaður í Bretlandi var nýlega handtekinn en hann hefur verið ásakaður um að nauðga stúlku oftar en einu sinni en hún er sögð hafa verið undir 10 ára aldri þegar brotin áttu sér stað.

Sunnudagsútgáfa The Sun greinir frá. Ekki er hægt að greina frá nafni mannsins af lagalegum ástæðum en The Sun segir hann vera vel þekktan í Bretlandi og um að sé að ræða íþróttafréttamann sem starfi í sjónvarpi og sé því kunnur sjónvarpsáhorfendum þar í landi.

Maðurinn sem er sagður giftur var handtekinn klukkan 4 að morgni og í kjölfarið fór fram húsleit á heimili hans sem er í suðurhluta Englands. The Sun greinir hins vegar ekki frá hvaða dag handtakan átti sér stað.

Íþróttafréttamaðurinn var fluttur á lögreglustöð og yfirheyrður. Hann var í haldi í alls 18 klukkustundir áður en hann var látinn laus gegn tryggingu. Á meðan hann var í haldi lagði lögreglan hald á tölvur og skjöl á heimili hans sem verða rannsökuð nánar.

Ekki kemur fram hversu langt er síðan að meintar nauðganir áttu sér stað en maðurinn mun þá hafa verið starfandi sem íþróttafréttamaður í sjónvarpi. Yfirmenn hans eru sagðir vita af ásökununum í hans garð en óljóst er hvort það á einnig við um samstarfsfólk íþróttafréttamannsins.

Óljóst er hversu gömul stúlkan, sem íþróttafréttamaðurinn er sakaður um að nauðga, er núna en meintar nauðganir munu hafa verið tilkynntar til lögreglu nýlega og tekin var skýrsla af stúlkunni af sérhæfðum lögreglumönnum og fór skýrslutakan fram á stað sem er sérstaklega ætlaður fyrir slíkt.

Eins og áður segir getur The Sun ekki greint frá nafni íþróttafréttamannsins en segir um sögulegar (e. historical) ásakanir að ræða.

Málið er nú til rannsóknar hjá lögreglu.