Aníta er hægt og rólega að læra að lifa upp á nýtt eftir að hafa verið greind með geðhvörf. Hún fékk greininguna eftir að hafa farið í fyrsta sinn í maníu í október 2022. Eitt af því sem hún gerði nýlega í bataferlinu var að hætta að drekka áfengi.
Aníta er nýjasti gestur Fókuss, spjallþætti DV. Brot úr þættinum má horfa á hér að neðan en smelltu hér til að horfa á hann í heild sinni.
Þú getur líka hlustað á Spotify, Apple Podcasts og hlaðvarpsþjónustu Google.
Aníta tók nýverið ákvörðun um að hætta að drekka áfengi.
„Ástæðurnar eru margar og flóknar, en aðallega því ég var alltaf á svo miklum bömmer. Ég var alltaf: Hvað var ég að gera í gær? Var ég að reyna við þennan, segja þetta við þennan, gera þetta og hitt, sagan endalausa. Ég fór í svakalega niðurtúra sem vörðu stundum í fimm daga,“ segir hún og bætir við að það sé mjög hátt gjald fyrir nokkurra klukkustunda skemmtun.
„Svo tek ég líka ákveðin lyf sem er ekki gott að drekka ofan í. Og eins og ég segi, ég þarf að hafa stjórn á öllu og þegar þú drekkur þá hefurðu ekki stjórn á sumum hlutum. Þú sleppir þér.“
„Ég fór í fyrsta skiptið á „djammið“ um daginn, fór á árshátíð edrú og ég gerði allt sem ég var vön að gera,“ segir Aníta, sem skemmti sér konunglega, dansaði og endaði kvöldið með pepperoni taco samloku fyrir framan sjónvarpið heima.
„En ég er alls ekki að dæma aðra fyrir að vilja vera gjörsamlega sósaðir, það er allt í lagi. Ég ber virðingu fyrir því fólki alveg eins og þau þurfa að bera virðingu fyrir minni ákvörðun.“
Aníta ræðir nánar um lífið, bæði fyrir og eftir greiningu, bataferlið og fleira í Fókus. Horfðu á þáttinn í heild sinni hér eða hlustaðu á Spotify.
Fylgstu með Anítu á Hennar heimur, bæði á Instagram og Facebook.
