Ástralskt heilbrigðisstarfsfólk biðlar til fólks sem verður fyrir snákabiti að koma ekki með gerandann með sér á spítala. Algengt er að fólk haldi að heilbrigðisstarfsfólk þurfi að sjá snákinn til að geta gefið rétt móteitur.
„Starfsfólkið verður hrætt en það alvarlegasta er að þetta tefur fyrir meðferðinni,“ sagði Adam Michael, læknir á bráðamóttökunni á Bundaberg spítalanum í Queensland fylki við ástralska ríkissjónvarpið, ABC, síðastliðinn mánudag.
Fyrr í þessum mánuði kom sjúklingur, bitinn af snáki, á bráðamóttökuna með snákinn sem beit hann með sér. Snákurinn er af tegundinni eystri brúnsnákur og er mjög eitraður. Starfsfólkinu fannst plastboxið, sem hinn lifandi snákur var geymdur í, ekkert sérstaklega traustvekjandi.
„Við viljum geta aðgætt með sjúklinga snögglega og að hafa lifandi eitursnák í herberginu tefur fyrir því,“ sagði Michael læknir.
Annar læknir og eiturefnafræðingur, Geoff Ibister við Newcastle háskóla í Ástralíu, segir þetta dæmi ekkert nýtt á áströlskum spítölum. En stórhættulegt.
„Þetta er hættulegt og enginn á spítalanum mun geta greint hvaða tegund af snák þetta er,“ sagði Ibister. „Ef snákurinn sleppur og kemst svo út af bráðamóttökunni þá er það stórslys.“
Fyrir utan að vera hættulegt og gagnslaust að koma með lifandi snák á spítalann þá hefur starfsfólkið ýmis tól til þess að meta hvað skal gera við snákabiti. Það er ýmis konar próf og mat á einkennum sjúklingsins sem segja til um hvort hann þurfi á móteitri að halda. Á áströlskum spítölum séu til staðar snákabitsviðbragðs pakkar.
Dýrafangarinn Jonas Murphy segist í mörg skipti hafa verið kallaður út í Bundaberg spítalann til þess að góma snáka sem sjúklingar höfðu komið með en sloppið.
„Ef þú kemur með snákinn með þér ertu að auka hættuna á að vera bitinn í annað skiptið. Þú ert einnig að leggja alla aðra í kringum þig í hættu,“ sagði Murphy. „Margt fólk er hrætt við snáka. Við viljum ekki hafa þá á spítölum.“
Að taka snákinn með á spítalanna eru ekki einu algengu mistökin sem snákbitið fólk á það til að gera. Samkvæmt ráðum sem gefin eru hjá spítalanum í Wide Bay í Ástralíu á heldur ekki að þvo sárið, ekki setja þykkan plástur á það, ekki setja snerilvöndul á útliminn sem bitinn var, ekki skera í sárið og ekki reyna að sjúga út eitrið með munninum.
