Fyrir tveimur árum var BIOEFFECT og Orf líftækni skipt upp í tvö fyrirtæki. BIOEFFECT er vinsælt alþjóðlegt snyrtivörumerki sem byggir á virkum innihaldsefnum sem Orf líftækni framleiðir úr byggi. Berglind Rán Ólafsdóttir, forstýra Orf líftækni, er gestur Ólafs Arnarsonar í hlaðvarpi Markaðarins á Eyjunni.

Markaðurinn - Berglind Rán Ólafsdóttir - 2.mp4

Þú nefndir það að búið væri að skipta upp, annars vegar snyrtivöruhlutanum og hins vegar líftæknihlutanum. Hvernig vildi það til að – manni finnst það einhvern veginn dálítið langsótt að sprotafyrirtæki byrji og það þróist þannig að þú ert kominn með annars vegar líftækni og hins vegar með snyrtivörur?

„Já, þetta var mjög áhugaverð þróun og það er eiginlega bara magnað hversu flott þetta vörumerki er, BIOEFFECT, sem byrjað var að þróa 2008 og selja 2009. Þetta er alveg svakalega flott alþjóðlegt merki sem er verið að selja út um allt og við framleiðum virku efnin í þessar vörur,“ segir Berglind.

Hún segir að munurinn á BIOEFFECT og snyrtivörum eins og við þekktum þær í gamla daga sé sá að núna virki efnin í þeim, og hlær.

„Ég er náttúrlega alls ekki sérfræðingur í snyrtivörugeiranum nema hvað ég hef alltaf haft gaman af kremum, en geirinn byggir mjög mikið á markaðssetningu og þarna er rosalega flott íslenskt vörumerki sem er með efni sem virka og við erum mjög stolt af því að framleiða þau í bygginu okkar,“ segir Berglind.