Ólafur Arnarson lýsir þeirri von sinni að Ragnar Þór Ingólfsson og Sólveig Anna Jónsdóttir þiggi frekar ráð og leiðsögn í komandi kjarasamningum frá Vilhjálmi Birgissyni en herskáustu ráðgjöfum sínum – þá sé von til að hér náist vitrænir kjarasamningar sem geti stuðlað að stöðugleika og verðbólguhjöðnun í stað þess að gerðir verði kjarasamningar sem reynist atvinnulífinu ofviða.

Í nýjum Náttfarapistli á Hringbraut varar Ólafur við því að gerðir verði samningar í anda „lífskjarasamninganna“ 2019, sem hann segir hafa einkennst af uppgjöf samningamanna Samtaka atvinnulífsins – samið hafi verið um styttingu vinnuviku, lengingu orlofs og hækkun launa langt umfram hagvöxt og afkomu atvinnufyrirtækja landsins. Afleiðingarnar hafi ekki látið á sér standa. Þeir sem gátu hækkað verð gerðu það og aðrir þjáðust. Niðurstaðan varð kunnugleg fyrir fólkið í landinu: Verðbólga, vaxtahækkanir og lækkandi ráðstöfunartekjur.

„Meðal margra forráðamanna fyrirtækja innan Samtaka atvinnulífsins byrjaði að krauma mikil óánægja og menn nöguðu sig í handarbökin fyrir að hafa látið samninga af þessu tagi fara svona í gegn. En við því var ekkert að gera annað en horfa fram á veginn. Reiði beindist gegn helstu samningamönnum Samtaka atvinnulífsins, þeim Halldóri Benjamín Þorbergssyni og Ásdísi Kristjánsdóttur. SA hafa aldrei látið fólk fara með látum frá sér heldur ýtt því kurteislega út. Það gerðist og Halldór fékk forstjórastöðu í skráðu fyrirtæki á markaði og Ásdís bjargaði sér tímanlega yfir á pólitíska sviðið og er nú bæjarstjóri Sjálfstæðisflokksins í Kópavogi. Væntanlega mun hún sýna meiri ráðdeild í störfum sínum þar en hún gerði sem hagfræðingur SA,“ skrifar Ólafur.

Hann segir Sigríði Margréti Oddsdóttur, nýjan framkvæmdastjóra SA vera vel menntaða og reynslumikla en hún hafi átt afleita innkomu í deilu flugumferðarstjóra í desember með aulabrandara um að „gefa þeim kartöflu í skóinn“. Hann á þó von á því að Sigríður Margrét endurtaki ekki slík mistök.

Þá segir Ólafur marga vilja sjá „farsælan formann Samtaka atvinnulífsins, Eyjólf Árna Rafnsson, stíga inn með áberandi hætti. Hann er laginn maður sátta.“

Náttfara í heild má lesa hér.