Rasmus Hojlund, framherji Manchester United, var ósáttur við leikmenn San Marínó í leik liðanna í gær er hann mætti þeim með danska landsliðinu í undankeppni EM 2024.

Liðin mættust í undankeppni EM 2024 í gær og lentu Danir óvænt í vandræðum með San Marínó sem er eitt slakasta landslið heims. Unnu þeir þó 1-2 sigur að lokum.

Hojlund vildi meina að leikmenn San Marínó hafi reynt að meiða sig viljandi en hann hefur verið að glíma við bakmeiðsli.

„Þeir tóku mig fyrir í dag. Þið sjáið það þarna í lokin. Ég skil ítölsku og heyrði þá segja að þeir ætluðu að kremja mig,“ sagði Hojlund eftir leik, en kappinn spilaði á Ítalíu á síðustu leiktíð.

„Þið sjáið á myndunum að hann var bara með eitt í huga. Það er algjört grín að hann hafi aðeins fengið gult spjald.“

Alessandro Tosi, leikmaður San Marínó, segir þetta af og frá.

„Þetta er ekki satt. Við sögðum honum bara að hann væri ekki að koma vel fram. Það sem hann gerði var ekki nauðsynlegt. Hann er stór og sterkur framherji en þetta var ekki sanngjarnt,“ segir Tosi.

„Ég hef ekki misst alla virðingu fyrir honum en við bjuggumst við betri hegðun. Hegðun hans þegar hann fagnaði var til að mynda óásættanleg.

Hann spilar í ensku úrvalsdeildinni þar sem leikmenn eru mun betri og sterkari en við. Hann ætti að vera vanur svona átökum,“ segir Tosi enn fremur.