Þórunn Sigurðardóttir, einn reyndasti menningarstjórnandi landsins, er gestur Einars Bárðarsonar í nýjasta hlaðvarpsþætti hans Einmitt.  Þórunn er formaður undirbúningsnefndar um stofnun Þjóðaróperu en nokkur styr hefur staðið um þau áform síðustu vikur. Áformin hafa verið sögð til höfuðs Íslensku óperunni en Þórunn vill bera klæði á þau vopn og fer yfir umræðuna um Þjóðaróperu sem nær aftur til ársins 1957 og fram til dagsins í dag. Hún segir löngu vera kominn tíma á það að sönglistin búi við sömu kjör og aðrar listgreinar í landinu.

Vinna úr mikilli forvinnu og samtölum við greinina

“Við erum að vinna úr gögnum sem unnin hafa verið síðustu misseri af ýmsum rýnihópum og úr samtölum við hagsmunafélög listamanna þar með talið Bandalaga íslenskra listamanna (BÍL) og Klassís,” segir Þórunn. 

“Okkar verkefni er að undirbúa þetta þannig að fyrsti óperustjóri Þjóðaróperu hafi tækifæri til að vinna að sinni sýn. Þannig sé það ekki verkefni nefndarinnar að binda hendur stjórnandans til framtíðar. Við erum að skoða formið og reksturinn víða um Evrópu og hvernig fjármunir eru best nýttir fyrir listina.” 

Samtal um Þjóðaróperu nær aftur til ársins 1957

Þórunn fer yfir þetta nýja verkefni hennar, aðdraganda og forsendur þess að hún tók verkefnið að sér í samtali þeirra Einars en hugmyndir um Þjóðaróperu má rekja allt aftur til ársins 1957 þegar Ragnhildur Helgadóttir þingkona og síðar ráðherra vakti fyrst máls á stofnun slíkrar Óperu. Svo aftur árið 1978 þegar Ragnar Arnalds, þáverandi menntamálaráðherra, sagði að engin stétt listflytjenda væri jafn óafskipt og söngvarar.

Kominn tími til að sönglistin standi jafnfætis öðrum greinum

„Það er kominn tími til að þessi listgrein standi jafnfætis öðrum listgreinum í landinu eins og Þjóðleikhúsið, eins og Sinfónían og Dansflokkurinn. Sá tími er kominn og Lilja er tilbúin að berjast fyrir þessu,” segir Þórunn sem segist ekki eiga óvini í þessum geira og segist treysta því að stjórnendur Íslensku Óperunnar og undirbúningsnefndin muni ná saman fyrr eða síðar.

Hægt er að hlusta á samtal Þórunnar og Einars í nýjasta þættinum af Einmitt.