Skurðlæknir í Tennessee-ríki í Bandaríkjunum var í gær skotinn til bana af sjúklingi á læknastofunni þar sem hann starfar. Að sögn the New York Post beið sjúklingurinn á stofunni í marga klukkutíma áður en hann myrti lækninn, Benjamin Mauck.

Morðið var framið í einu af skoðunarherbergjum læknastofunnar sem sérhæfir sig í bæklunarlækningum og er staðsett í bænum Collierville. Lögreglustjóri bæjarins sagði morðingjann aðeins hafa beint sjónum sínum að Mauck en hlíft öðru starfsfólki og sjúklingum.

Morðinginn skaut Mauck með skammbyssu og hljóp svo út af læknastofunni en lögreglan var þegar komin á staðinn og handtók hann. Nafn og aldur morðingjans hefur ekki verið gefið upp.

Sérsvið Mauck var bæklunaraðgerðir á olnbogum, höndum og úlnliðum. Hann hafði starfað á læknastofunni síðan 2012 og var nýlega á lista yfir bestu lækna á svæðinu.

Læknastofan sagði í yfirlýsingu atburðinn vera hryllilegan og missinn skelfilegan. Hugur og bænir allra á stofunni væru hjá fjölskyldu Mauck.

Hugsanlegur ástæður árásarinnar eru til rannsóknar en heyrst hefur að morðinginn hafi í um vikutíma fyrir árásina haft í hótunum við annan starfsmann læknastofunnar.

Stjórnmálamenn í Tennessee sem berjast fyrir hertri byssulöggjöf segja þetta enn eitt dæmi um morð sem hægt hefði verið að koma í veg fyrir með því t.d. að veita lagaheimildir fyrir því að neita manneskju um aðgang að skotvopni sem standi í hótunum við aðra.