Jamie Carragher hefur beðið Lisandro Martinez, varnarmann Manchester United, afsökunar á ummælum sínum í byrjun tímabils.

Martinez gekk í raðir United frá Ajax síðasta sumar. Carragher lét þá hafa eftir sér að Argentínumaðurinn væri allt of lágvaxinn til að spila sem miðvörður í ensku úrvalsdeildinni.

Martinez hefur hins vegar staðið sig frábærlega.

„Maður hélt að hann myndi lenda í vandræðum en annað kom á daginn,“ segir Carragher.

„Allir hafa sína galla, hverjir sem þeir kunna að vera. Þeir geta verið líkamlegir, tæknilegir. Bestu leikmennirnir fela veikleika sína.

Við höfum þá allir. Enginn er hinn fullkomni leikmaður. Ég horfði bara á hann og hugsaði: Hvernig getur þú yfirstigið þetta í ensku úrvalsdeildinni.“

Carragher hefur aldeilis verið minntur á ummæli sín í byrjun tímabils.

„Ég sendi Lisandro og stuðningsmönnum United afsökunarbeiðni. Ef þið gætuð hætt að senda mér skilaboð um Lisandro Martinez væri það frábært.“