Ítalska blaðið Gazetta dello Sport segist hafa heimildir fyrir því að Svíinn magnaði, Zlatan I­bra­himo­vic, muni leggja knatt­spyrnu­skóna á hilluna í sumar þegar að samningur hans við ítalska úr­vals­deildar­fé­lagið AC Milan rennur út.

Hinn 41 árs gamli Zlatan taki þessa á­kvörðun með það til hlið­sjónar að hafa nú til lengri tíma verið að glíma við hné­meiðsli. Zlatan muni hins vegar ekki yfir­gefa her­búðir AC Milan heldur taka að sér hlut­verk sendi­herra hjá fé­laginu.

Zlatan hefur verið frá á yfir­standandi tíma­bili vegna hné­meiðsla en hafði gert sér vonir um að snúa aftur í leik­manna­hóp AC Milan gegn Totten­ham í Meistara­deild Evrópu. Hins vegar eru líkurnar á endur­komu þá taldar afar litlar en leikirnir við Totten­ham í 16-liða úr­slitum fara fram um miðjan febrúar.

Þessi sænski marka­hrókur hefur verið á mála hjá AC Milan frá því árið 2020 er hann kom til fé­lagsins frá LA Galaxy. Þar áður hafði hann unnið glæsta sigra með fé­lögum á borð við Paris Saint-Germain, Barcelona, Juventus, Inter- og AC Milan.

Þá var Zlatan á mála hjá Manchester United á árunum 2016-2018.