Kínverskir lyfjaframleiðendur hamast nú við að framleiða lyf gegn kórónuveirunni skæðu. Þetta eru hitalækkandi lyf og önnur lyf sem hægt er að nota gegn smiti. Ástæðan er að nú um helgina fagna Kínverjar nýju ári og hafa valdhafa miklar áhyggjur af nýársfögnuðinum.

Xi Jinping, forseti, hefur sagt að hann hafi áhyggjur af ferðum margra landa sinna út á land þar sem yfirvöld séu ekki eins vel í stakk búin til að takast á við skyndilega útbreiðslu veirunnar.

Um mánuður er síðan kínversk yfirvöld afnámu skyndilega allar sóttvarnaaðgerðir og slepptu veirunni í raun lausri. Það hefur valdið miklum faraldri og telur breska fyrirtækið Airfinity, sem sérhæfir sig í að meta heilsufarsáhættu, að allt að 36.000 manns látist nú á dag af völdum veirunnar.

Á sunnudaginn sögðu yfirvöld að um 60.000 manns hefðu látist af völdum veirunnar á sjúkrahúsum landsins frá 8. desember til 12. janúar. Þetta eru tíu sinnum fleiri en þau höfðu áður sagt að hefðu látist.

Inni í þessum tölum eru ekki þeir sem deyja heima hjá sér og kínverskir læknar hafa sagt að þeim sé ráðið frá því að skrifa COVID-19 sem dánarorsök á dánarvottorð.

Sérfræðingar í heilbrigðismálum segja opinberar tölur séu líklega langt frá raunveruleikanum. Miðað við fréttir af álagi á sjúkrahús og langar raðir við útfararstofur og líkbrennslur megi ætlað að dauðsföllin séu miklu fleiri. „Kannski nær 600.000 en bara 60.000,“ sagði Ben Cowling, farsóttafræðingur við Hong Kong háskóla.