Á miðvikudaginn tilkynnti Vladímír Pútín, Rússlandsforseti, um markmið rússneska hersins á næstu árum. Þessi tilkynning hans fór ekki fram hjá Arne Bård Dalhaug, fyrrum yfirmanni norska hersins.

„Veit Pútín hversu slæm staðan er hjá rússneska hernum eða lýgur hann meðvitað?“ sagði hann í samtali við Dagbladet.

Meðal þess sem kveikti þessa spurningu hjá honum var að Pútín sagði meðal annars að ekkert þak verði á útgjöldum til hersins og að hann fái nútímalegan búnað.

Auk þess kynnti hann áætlun um að fjölga hermönnum og um stofnun nýrrar hersveitar í norðvesturhluta landsins, nærri landamærum Finnlands og Svíþjóðar sem hafa sótt um aðild að NATO.

Dalhaug segir að þetta sé ekkert annað en „draumórar“ hjá Pútín og að óskir hans um að stofna nýja herdeild innan skamms tíma séu „algjörlega óraunhæfar“.

„Við vitum að herkvöddu hermennirnir hafa fengið að vita að þeim verði sjálfir að kaupa nær allan búnað sinn ef þeir vilja halda á sér hita. Þeir þurfa líka að kaupa skyndihjálparbúnað. Það er ljóst að Rússar geta ekki séð öllum hermönnum sínum fyrir nútímavopnum og búnaði. Svo einfalt er það,“ sagði hann.

Þegar hann var spurður hvort Pútín viti eiginlega hvernig ástandið er hjá hernum eða hvort hann lýgur, svaraði hann: „Við vitum raunar ekki hversu góða yfirsýn hann hefur.“