Öryggismiðstöðin er þessa dagana að kynna nýja kynslóð rafrænna lyfjaskammtara inn á íslenskan markað. Lyfjaskammtarinn hefur þegar verið tekinn í notkun í Skandínavíu og var meðal annars nýlega valinn til notkunar fyrir íbúa Oslóar. Kemur þetta fram í fréttatilkynningu.

Notkun rafrænna lyfjaskammtara hefur aukist jafnt og þétt frá því þeir komu fyrst á íslenskan markað fyrir um fimm árum. „Tækin hafa sannað gildi sitt bæði fyrir heilbrigðiskerfið og notendur. Fyrir heilbrigðiskerfið hafa þau meðal annars minnkað umtalsvert þörf á innlitum heimaþjónustu, á sama tíma og tæknin eykur öryggi, lífsgæði og bætir meðferðarheldni hjá notendum,“ segir Diljá Guðmundardóttir, sérfræðingur í heilbrigðistækni hjá Öryggismiðstöðinni.

Lyfjaskammtarinn er hannaður með einfaldleika að leiðarljósi og er bæði notendavænn fyrir starfsfólk og þá sem nota hann daglega. Hann er léttur, meðfærilegur, allar nauðsynlegar leiðbeiningar aðgengilegar á stórum skjá á tækinu og það tekur innan við mínútu að fylla á hann fyrirframpökkuðum lyfjarúllum, að sögn Diljár. Allt eru þetta eiginleikar sem starfsfólk heimaþjónustu og notendur taka fagnandi.

„Þessi nýja kynslóð lyfjaskammtara hefur fengið mjög góðar viðtökur bæði hérlendis og á Norðurlöndum. Hann er þegar kominn í notkun í Noregi og Svíþjóð, þar sem hann er að reynast mjög vel, og við erum nú þegar byrjuð að kynna hann víða um land,“ segir Diljá.

Hún segir að með þessari nýjung stígi Öryggismiðstöðin mikilvægt skref í átt að auknu öryggi, betri möguleikum á sjálfstæðri búsetu eldra fólks í heimahúsum og bættri þjónustu í lyfjagjöf.