BBC skýrir frá þessu. Fram kemur að lögreglan segi að par, sem ekki átti börn, hafi lokkað hana til sín með loforði um ís og síðan numið hana á brott.
Pooja bjó með foreldrum sínum og tveimur bræðrum í litlu húsi í fátækrahverfi í Mumbai áður en hún var numin á brott. Daginn örlagaríka hafði hún rifist við bróður sinn og hafði hann skilið hana eftir við skólann. Þar kom parið að og lokkaði hana til sín með loforði um að þau myndu kaupa ís handa henni.
Þau fluttu síðan til annarra ríkja með „nýju“ dóttur sína og höfðu sífellt í hótunum um að meiða hana ef hún gréti eða drægi að sér athygli.
Hún segist hafa fengið að ganga í skóla en þegar parið eignaðist barn var hún tekin úr skóla og fjölskyldan flutti aftur til Mumbai.
Eftir að parið eignaðist sjálft barn var Pooja misþyrmt illilega af þeim. Hún segir að þau hafi slegið hana með belti, sparkað í hana og lamið. „Eitt sinn lömdu þau mig svo illa með kökukefli að það blæddi úr bakinu,“ sagði hún.
„Ég var einnig neydd til að sinna húsverkum samhliða því að ég vann í 12 til 24 klukkustundir utan heimilisins,“ sagði hún einnig um hryllingin sem hún mátti þola.
Hún var undir stöðugu eftirliti og fékk ekki að nota síma og fékk enga peninga.
En dag einn náði hún farsímum parsins á meðan þau sváfu. Hún leitaði að nafninu sínu á YouTube og fann fjölda myndbanda um hvarf hennar. Einnig fann hún símanúmer sem var hægt að hringja í með upplýsingar um málið.
En það liðu sjö mánuðir þar til hún hafði safnað nægum kjarki til að segja ráðskonunni, í húsinu þar sem hún starfaði sem barnapía, frá þessu. Ráðskonan kom á sambandi við móður Pooja og kom á fundi.
Á honum staðfesti móðirin að þetta væri Pooja með því að skoða fæðingarblett á henni. „Efinn hvarf algjörlega. Ég vissi að ég hafði fundið dóttur mína,“ sagði móðir hennar.
Í kjölfarið fór Pooja til lögreglunnar og skýrði frá málinu.
Nokkrum mánuðum áður en hún sameinaðist fjölskyldu sinni á nýjan leik lést faðir hennar.
