Hryllilegt myndband er nú í dreifingu á samfélagsmiðlum sem sýnir meinta stríðsglæpi rússneska hersins. Í myndbandinu má sjá hóp rússneskra hermanna halda úkraínum hermanni niðri. Síðan tekur einn þeirra tekur síðan upp dúkahníf, sker kynfærin undan fanganum og lyftir þeim síðan upp að linsu myndavélarinnar.

Myndabandið hefur valdið gríðarlegri reiði í Úkraínu og víðar um heim og sagt enn eitt dæmið um meinta stríðsglæpi Rússa í Úkraínu. Meðal annars deildi úkraínskur þingmaður, Inna Sovsun, myndbandinu á Twitter og sagði þetta dæmi um grimmdarverk nasista í Úkraínu og fullyrti að um tétneska hermenn væri að ræða. „Rússland þarf að borga fyrir þetta,“ skrifaði Sovsun meðal annars í færslunni.

Í kjölfarið var hún sett í bann á samfélagsmiðlinum enda myndbandið viðurstyggilegt áhorfs. Nokkru síðar fékk hún aftur aðgang að reikningi sínum á samfélagsmiðlum og birti þá skjáskot af fyrra tvíti þar sem búið var að blörra myndina af myndbandinu ógeðfellda.

Sérfræðingurinn Aric Toler, sem meðal annars hjálpaði til að bera kennsl á þá grunuðu í Salisbury-eitruninni, sagði við The Times að ekkert benti til þess að myndbandið hefði verið falsað. Rússneska ríkissjónvarpið hefði birt myndskeið af sömu hermönnum borginni Severodonetsk í júnímánuði.

Fréttastofa Sky News greinir frá því að annað myndband, sem blaðamenn miðilsins hafa horft á, sýnir fangann bundinn og síðan skotinn í höfuðið.

Í yfirlýsingu frá utanríkisráðuneyti Úkraínu eru hroðalegir stríðsglæpir innrásarliðsins fordæmdir og skorað á Alþjóðlega sakamáladómstólinn að rannsaka málið.

Síðan innrásin hófst í febrúar hafa Rússar verið sakaðir um þúsundir stríðsglæpa. Alþjóðlegi sakamáladómstólinn hefur sagt Úkraínu vera „einn stóran sakamálavettvang“ og hefur sent fjölmennt lið til þess að rannsaka hina meintu glæpi.