Þetta segir Hilmar Kolbeinsson, 45 ára fjölfatlaður maður í samtali við Fréttablaðið. Hilmar hefur síðasta árið dvalið á spítala og á hjúkrunarheimili á víxl en núna í febrúar gat hann loksins farið heim til sín eftir að hann réði til sín tvo ófaglærða starfsmenn með beingreiðslusamningi við Reykjavíkurborg.
Núna um helgina veiktist annar af þessum starfsmönnum og var því enginn heima hjá honum frá föstudagskvöldinu og fram á fyrri hluta sunnudags. Hilmar tilkynnti heimahjúkrun borgarinnar hvernig í pottinn var búið á föstudagskvöldinu en þar sagði starfsmaður að það mætti ekki koma til hans nema starfsmaður hans væri viðstaddur.
Eftir það hringdi Hilmar í bráðamóttöku Landspítalans sem sagði að þetta væri ekki þeirra mál. „Þeir sögðu að ég mætti sitja í stólnum yfir helgina, það sé allt í lagi,“ segir hann í samtali við Fréttablaðið. Bráðamóttakan sagði Hilmari að ræða við Læknavaktina sem vísaði þá aftur til baka á heimahjúkrun borgarinnar.
Hilmar getur ekki borðað eða drukkið án hjálpar, hann fór því í gegnum nánast alla helgina án drykks eða matar. „Það þarf að setja á disk fyrir framan mig, ég get ekki sett á disk sjálfur. Ef það er búið að setja á disk fyrir framan mig og brytja niður þá get ég borðað sjálfur. Það þarf að hella í glas fyrir mig, þá get ég drukkið sjálfur. Ég var orðinn mjög þyrstur á sunnudagskvöldinu.“
Að lokum segir Hilmar í samtali sínu við Fréttablaðið að hann sé búinn að ræða við félagsráðgjafa vegna málsins og að hann geri ráð fyrir því að senda erindi á Landspítalann.
