Kafarar hafa fundið lík allra fjögurra farþeganna sem voru um borð í flugvélinni TF-ABB sem lenti ofan í Þingvallavatn. Oddur Árnason, yfirlögregluþjónn hjá lögreglunni á Suðurlandi, staðfestir þetta við Vísi.
Veður er hins vegar orðið of vont til þess að hægt sé að tryggja öryggi kafaranna og því er verið að ljúka aðgerðum við vatnið í kvöld. Ekki verður því unnt að ná líkunum upp úr vatninu að sinni.
Í tilkynningu frá lögreglu kemur fram að líkamsleifar fjórmenninganna hafi verið staðsettar á 37 metra dýpi og neðar í vatninu. Þegar sé hafin skipulagning björgunaraðgerða og verði gengið í þær strax og veður leyfir.
Fram hefur komið að flugmaður vélarinnar hét Haraldur Unason Diego og með honum í vélinni voru þrír erlendir ferðamenn. Í tilkynningu frá lögreglu kemur fram að aðstandendur hafi verið upplýstir um stöðu mála. Þeir hafa beðið fyrir kærar kveðjur til björgunaraðila allra fyrir þeirra störf undanfarna daga og er þeim hér með komið til skila. Jafnframt þakkar lögreglan á Suðurlandi öllum þeim sem hafa lagt hönd á plóginn fram að þessu enda þó stór og krefjandi verkefni sé framundan ennþá við úrlausn þessa máls.
