Leit með kafbáti í Þingvallavatni seinni partinn í dag leiddi í ljós að enginn er um borð í flugvélarflakinu. Þetta kemur fram í tilkynningu frá lögreglu en þar segir að ljóst sé að þeir fjórir einstaklingar sem voru um borð hafi komist út úr vélinni af sjálfsdáðum eftir að hún lenti í vatninu.

Slysstaður er um 1 km frá landi þar sem styst er. Svæðisstjórn björgunarsveita hefur vegna þessa hafist handa við að skipuleggja áframhaldandi leit í og við vatnið á morgun. Fjörur voru gengnar þar í dag og voru síðustu hópar að klára verk sín rétt fyrir klukkan tíu án árangurs.

Í tilkynningu lögreglu segir:

„Leitarhópar hafa verið boðaðir til leitar á morgun á og við vatnið eftir nánara skipulagi svæðisstjórar björgunarsveita.  Ljóst er að ef það ber ekki árangur verður ekkert aðhafst þar á mánudag og að líkindum lítið á þriðjudag vegna veðurs.“