Fréttir þess efnis að útvarpsmanninum Jóni Má Ásbjörnssyni á X-inu hafi verið vikið frá störfum á grundvelli ásakana frá konum hafa vakið mikla athygli.
Jón Már er einnig þekktur sem söngvari hljómsveitarinnar Une Misère. Þórhallur Gunnarsson, framkvæmdastjóri miðla hjá Sýn, staðfesti þessa ákvörðun í samtali við mbl.is um helgina.
Vart hefur verið við ásakanir gegn Jóni á samfélagsmiðlum um nokkurt skeið. Í kjölfar fréttarinnar bárust DV misvísandi ábendingar um málið, annars vegar þess efnis að þessar ásakanir vörðuðu ekki meint kynferðisbrot heldur tilfinningalegt ofbeldi og kæmu frá einni konu.
Hins vegar fékk DV ábendingar þess efnis að ásakanir gegn manninum kæmu úr fleiri en einni átt og snerust meðal annars um kynferðisofbeldi.
DV hefur einnig fengið upplýsingar um að Jón Már hafi almennt verið vel liðinn á Sýn og brottreksturinn komið mörgum þar á bæ í opna skjöldu.
DV hafði samband við Þórhall Gunnarsson í morgun sem sagðist vera upptekinn á fundi en lýsti sig reiðubúinn að svara skriflega fyrirspurn um málið. Í fyrirspurninni var Þórhallur spurður hvort málið snerist um ásakanir um kynferðisofbeldi, hvort þær kæmu frá fleiri en einum aðila og hvað Sýn hefði gert til að rannsaka málið. Þórhallur svaraði að hann hefði haft samband við ásakanda Jóns Más og fengið upplýsingar sem hann tæki alvarlega. Hann hefði einnig rætt málið við Jón Má og fengið hans hlið áður en hann tók ákvörðun. Svar Þórhalls er eftirfarandi:
„Ég fékk ábendingar um ásakanir gagnvart starfsmanni okkar á samfélagsmiðlum.
Ég hafði samband við þann aðila sem birti þessar ásakanir og fékk upplýsingar sem ég tók alvarlega. Í framhaldinu fékk ég símtal frá öðrum einstaklingi sem útskýrði sína hlið málsins og var hún í samræmi við fyrri frásögnina.
Ég hafði áður fengið útskýringar frá starfsmanni mínum og í ljósi allra upplýsinga ákvað ég að hann skyldi ljúka störfum strax.“
Uppfært kl. 14:30 Jón Már Ásbjörnsson er hættur störfum í hljómsveitinni Une Misère vegna sömu mála og urðu til þess að hann var rekinn af X-inu.