Arsenal er sagt hafa áhuga á að kaupa kantmanninn Khvicha Kvaratskhelia frá Paris Saint-Germain í sumar.

Vefmiðillinn Teamtalk segir að Arsenal sé stórhuga fyrir sumarið, sérstaklega vegna þeirra fjármuna sem félagið býr yfir eftir árangur sinn í Meistaradeildinni. Liðið er komið í úrslitaleik, þar sem það mætir einmitt PSG, og hefur það skilað yfir 120 milljónum punda í kassann.

Kvaratskhelia, sem gekk í raðir PSG frá Napoli fyrir einu og hálfu ári og átti risastóran þátt í að liðið varð Evrópumeistari í fyrra, er þó sagður mjög sáttur í París og gæti orðið erfitt að lokka hann þaðan.

Á þessari leiktíð hefur Kvaratskhelia skorað 18 mörk og lagt upp 10 til viðbótar. Mikel Arteta ku vilja bæta við stjörnuleikmanni í sóknarlínu sína í sumar.