Menn ruddust inn í íbúð í Kópavoginum í dag, réðust á húsráðanda íbúðarinnar, hótuðu honum og bundu hann niður. Þetta er á meðal þess sem fram kemur í dagbók lögreglu.

Eftir að mennirnir voru búnir að binda húsráðandann tóku þeir verðmæti af heimilinu, til dæmis greiðslukort og lyf. Mennirnir fóru í kjölfarið af vettvangi en hótuðu þó að þeir myndu koma aftur.

Maðurinn náði að losa sig og óskaði þá eftir lögreglu á vettvang.  „Mennirnir komu aftur áður en lögregla kom á vettvang og er þeir heyrðu að lögregla væri á leiðinni forðuðu þeir sér,“ segir lögreglan um málið en það er nú í rannsókn.

Í dagbókinni er einnig greint frá því að flugeldum hafi verið kastað inn um glugga á baðherbergi í Hafnarfirðinum. Skemmdirnar eru sem betur fer sagðar vera minniháttar.

Þá voru nokkrar bifreiðir stöðvaðar af lögreglunni. Einn ökumaður var stöðvaður vegna notkunar farsíma undir stýri, annar var stöðvaður vegna gruns um akstur undir áhrifum áfengis og einn var svo grunaður um akstur undir áhrifum fíkniefna.

Einn ökumaður var stöðvaður fyrir of hraðan akstur en sá ökumaður er í þokkabót grunaður um að hafa verið að aka undir áhrifum áfengis og fíkniefna.