Tvö ár eru nú liðin frá því að fyrstu fréttir tóku að berast af dularfullri veiru sem gekk manna á milli í Wuhan héraði í Kína. Þann 28. febrúar næstkomandi verða svo liðin tvö ár frá því að fyrsta smitið greindist hér á landi.

Fyrir faraldurinn voru Íslendingar án efa ein ferðaþyrstasta þjóð heims, en samkvæmt tölum Íslandsstofu fyrir árið 2019 fóru Íslendingar að meðaltali rétt tæplega þrisvar á ári í frí út fyrir landsteinana.

Eins og við var að búast hafa þessar tölur hrunið undanfarin tvö ár á Covid tímum, en þó er ljóst að rofað hefur til. Play tilkynnti til að mynda í gær að flugfélagið hafi flutt yfir 101 þúsund farþega á fyrstu sex mánuðum og á tímabili síðasta haust virtist hreinlega öll þjóðin vera á faraldsfæti eftir að hafa hlýtt fyrirmælum um að „ferðast innanlands“ árið áður.

Þrátt fyrir allan þennan fjölda á faraldsfæti hafa ferðaviðvaranir verið í gildi til allra landa heims síðan í lok síðasta árs, og þar áður voru öll lönd heims nema Grænland talin til hættusvæða.

DV spyr því, af einskærri forvitni, hefur þú ferðast til útlanda á undanförnum tveimur árum, og ef svo – hversu oft?