Um klukkan hálf eitt í nótt kom húsráðandi að manni sem var búinn að brjóta rúðu í íbúð hans og var kominn hálfur inn. Gerandinn forðaði sér á hlaupum. Málið er í rannsókn.
Á öðrum tímanum í nótt var tilkynnt um mann sem væri að sparka upp hurð hjá nágranna sínum í Hlíðahverfi. Maðurinn reyndist vera ofurölvi og hafði farið húsvillt. Hann var fluttur á lögreglustöð til viðræðna og var síðan látinn laus.
Nokkrar tilkynningar bárust um eldsvoða í gærkvöldi og nótt, það er að segja annað en gróðurelda.
Skömmu fyrir miðnætti var tilkynnt um eld í þaki á fjölbýlishúsi í Hlíðahverfi. Íbúar réðu niðurlögum eldsins. Þegar tuttugu mínútur voru liðnar af nýja árinu var tilkynnt um eld í þaki grunnskóla í Hlíðahverfi. Slökkvilið og lögregla fóru á vettvang.
Um klukkan þrjú var tilkynnt um sinueld á þaki íbúðarhúss í Háaleitis- og Bústaðahverfi. Eldurinn var dauður þegar viðbragðsaðilar komu á vettvang.
Á níunda tímanum í gærkvöldi fór flugeldur inn um glugga á íbúðarhúsnæði í Hafnarfirði. Eignatjón hlaust af. Um miðnætti fór flugeldur inn um glugga á íbúðarhúsnæði í Hafnarfirði. Eldur kviknaði og tjón hlaust af innanhúss. Enginn var heima þegar þetta gerðist.
Klukkan 00.22 var tilkynnt um eld í íbúð í Kópavogi. Slökkvistarf gekk vel og réði slökkvilið niðurlögum eldsins.
Klukkan 01.36 var tilkynnt um eld á svölum í fjölbýlishúsi í Breiðholti. Tvær íbúðir skemmdust.
Í Kópavogi fór flugeldur inn um glugga á skóla í nótt.
Klukkan 00.23 var tilkynnt um eld í þaki íbúðarhúsnæðis í Grafarvogi. Töluvert tjón varð á þakinu.
