Morgunblaðið skýrir frá þessu. Ríkisstjórnin kemur saman í dag og verður minnisblaðið rætt á fundi hennar og að honum loknum verður tilkynnt um hvort og þá hvaða sóttvarnaaðgerða verður gripið en núgildandi aðgerðir gilda þar til á morgun.
Morgunblaðið hefur eftir Sigurði Inga Jóhannssyni, innviðaráðherra, að þrátt fyrir að staðan sé almennt góð þá hafi smitum fjölgað og nýja afbrigið sé greinilega meira smitandi. „Ef við horfum á reynsluna, sérstaklega í Danmörku, þá segir það okkur að skynsamlegt sé að fara varlega. Það er í því ljósi sem við förum á þennan ríkisstjórnarfund og tökumst á við þetta verkefni sem virðist engan enda ætla að taka,“ sagði hann.
Í fyrradag voru 3.845 sýni tekin og af þeim voru 220 jákvæð. Thor Aspelund, prófessor í líftölfræði við Háskóla Íslands, sagði í samtali við mbl.is í gær að búast megi við að 300 smit greinist á einum degi fyrir jól.
11 COVID-19-sjúklingar liggja nú á Landspítalanum, tveir þeirra eru á gjörgæsludeild og annar þeirra í öndunarvél. Meðalaldur sjúklinganna 11 er 64 ár.
Mbl.is hafði eftir Þórólfi Guðnasyni í gær að hann taki frekar mið af stöðunni á spítalanum en daglegum smittölum þegar komi að því að meta stöðuna í samfélaginu. Hann sagði mikilvægt að fólk fái örvunarskammtinn til að vinna gegn Ómíkronafbrigðinu. Hann sagði einnig að nokkuð sé um að fólk sé að smitast aftur af veirunni. „Það er greinilegt að bólusetningin og fyrri smit eru að vernda ágætlega gegn Delta-afbrigðinu. Síðan kemur þetta Ómíkron-afbrigði með nýtt landslag sem við höfum fyrir framan okkur. Það virðist vera að fyrri Covid-sýkingar séu ekki að vernda neitt sérstaklega vel heldur gegn þessu afbrigði,“ sagði hann.
