Í Fréttablaðinu í dag var birtur bakþanki eftir Margréti Kristmannsdóttur, framkvæmdastjóra Pfaff, en í bakþankanum ræðir Margrét um ófrjósemi, hún segir að ófrjósemi sé mun algengari en marga grunar

Margrét tengist náið ungu pari sem er að glíma við það erfiða hlutskipti sem ófrjósemin er en parið opnaði sig nýverið á samfélagsmiðlum sínum um ófrjósemina. „Er þessi bakþanki skrifaður með þeirra samþykki – enda umræðan þörf.Það sjá flestir fyrir sér lífið á ákveðinn hátt – við menntum okkur, hefjum sambúð og þegar við teljum rétta tímann kominn þá hefjast barneignir. En stundum bara koma börnin ekki þegar við viljum,“ segir Margrét.

„Ungt fólk fyllist von og eftirvæntingu í hverjum mánuði en upplifir síðan sorg mánuð eftir mánuð – jafnvel ár eftir ár, þegar ljóst er að þungun hefur ekki átt sér stað eða fósturlát orðið. Fylgikvillar eins og þunglyndi, kvíði og skert sjálfsmynd geta ágerst og allt þetta álag getur reynt verulega á ungt samband.“

Vísindunum hefur fleygt fram og nú er hægt að hjálpa mörgum sem eiga í erfiðleikum með ófrjósemina að eignast barn. Margrét bendir þó á að það ferli sé bæði kostnaðarsamt og að það reyni á. „Fólk sem glímir við ófrjósemi á ekki að burðast með þetta verkefni eitt – við eigum að vera óhrædd að ræða ófrjósemi.“

Margrét segir þá að með auknum skilningi og þekkingu á ófrjósemi aukist líkurnar á utanaðkomandi stuðningi fyrir þau sem glíma við hana. „Stuðningi sem þetta unga fólk þarf svo mikið á að halda.“

Að lokum segir Margrét frá mikilvægum og sterkum skilaboðum er varða ófrjósemi frá þessu unga pari. „Aldrei spyrja fólk á barneignaaldri hvort það ætli ekki að drífa sig í að koma með barn! Þau eru annaðhvort að reyna það – geta það ekki eða langar ekki til þess.“