Tyrkir keyptu nýlega fullkoman þýska dísilkafbáta og Grikkir pöntuðu háþróaðar franskar freigátur. Ríkisstjórnirnar í Grikklandi og París hafa gert með sér samkomulag sem felur í sér skuldbindingu um að ríkin komi hvort öðru til aðstoðar ef á þau verður ráðist af þriðja ríki.
Tyrkir eru ekki sáttir við þetta og nýlega varaði Hulusi Akar, varnarmálaráðherra, Grikki við því að hefja vopnakapphlaup við Tyrki. Hann sagði að samningur þeirra við Frakka og vopnakaup muni ekki veita þeim neitt forskot á Tyrkland. Þetta sagði hann í samtali við dagblaðið Hurriyet.
En Tyrkir geta litið í eigin barm varðandi faðmlög Grikkja og Frakka því á síðustu árum hefur ítrekað komið til árekstra á milli tyrkneskra og grískra herskipa nærri Kýpur og á milli Frakka og Tyrkja við strendur Líbíu. Aðalástæðan fyrir þessu eru boranir Tyrkja eftir olíu á hafsvæðum sem önnur ríki gera einnig tilkall til.
Ísrael og Egyptaland eru einnig í hópi ríkja sem eru andsnúin Tyrkjum því þau eru ósátt við túlkun þeirra á yfirráðum yfir hafsvæðum. Egyptar sýndu óánægju sína í verki nýlega þegar þeir sömdu við Grikki um að tengja raforkukerfi ríkjanna saman. Til þess að það geti orðið þarf að leggja streng á hafsbotni yfir svæði sunnan við grísku eyjuna Krít en Tyrkir telja þetta hafsvæði vera tyrkneskt.
