Bandaríska alríkislögreglan hefur leitað að Brian Laundrie síðustu vikur en hann er talinn vita eitthvað um hvernig andlát Gabby Petito bar að en hún var unnusta hans. Brian sneri einn heim úr ferðalagi þeirra um Bandaríkin í byrjun september og vildi ekkert segja um hvar Gabby væri. Lík hennar fannst nokkrum vikum síðar í þjóðgarði í Wyoming. Tveimur dögum áður en lík hennar fannst hvarf Brian frá heimili foreldra sinna í Flórída og hefur ekki sést síðan. Nú virðist málið hafa undið enn frekar upp á sig miðað við það sem einn notandi Pinterest segir.

Viðkomandi, Shaynah Dodge, er bloggari sem býr í Minnesota. Hún fylgist náið með máli Brian og Gabby og á mánudaginn birti hún færslu þar sem hún bendir á undarlegt atriði varðandi Brian. „Fyrir þremur vikum deildi ég færslu um Pinterestprófíl Brian Laundrie. Á skjáskoti mínu frá því fyrir þremur vikum sést að hann fylgdi 145 manns. Í gærkvöldi kíkti ég á prófílinn hans og tók eftir að nú fylgir hann 146 manns. Er það ekki undarlegt?“

Spyr hún og bætir við: „Auðvitað fjölgar fylgjendum hans í takt við að fólk hópast á síðuna hans en hvernig stendur á því að þeim fjölgar sem hann fylgir?“

Hún segist vera viss um að umræddur Pinterestprófíll tilheyri Brian því hann hafi deilt efni þar með Gabby og móður sinni.