Leyniþjónusta norsku lögreglunnar, PST, telur að ódæðisverkin í Kongsberg í gær hafi verið hryðjuverk. Norskir fjölmiðlar hafa birt mynd af ódæðismanninum sem og nafn hans.

Hann heitir Espen Andersen Bråthen og er 37 ára danskur ríkisborgari búsettur í Kongsberg. Hann varð fjórum konum og einu karli að bana í gærkvöldi.

Í fréttatilkynningu frá PST kemur fram að eins og staðan sé núna virðist sem að um hryðjuverk hafi verið að ræða. Fram kemur að frekari rannsóknar sé þó þörf til að fá endanlega niðurstöðu í þetta.

Á fréttamannafundi lögreglunnar í morgun kom fram að hún hefði fengið tilkynningar um að Bråthen, sem hafði snúist til Íslamstrúar, væri öfgasinni. Síðasta slíka tilkynningin barst 2020.

PST segist hafa haft vitneskju um manninn frá því áður en ekki sé hægt að veita nánari upplýsingar um hann.

PST rannsakar nú hvort hætta sé á fleiri voðaverkum, til dæmis í hefndarskyni eða þá að einhver hermi eftir Bråthen.

Þrátt fyrir atburðina í gær telur PST að hryðjuverkaógnin sem steðjar að Noregi sé ekki mikil en ekki sé útilokað að öfgasinnaðir Íslamistar eða öfgahægrimenn reyni að fremja hryðjuverk í landinu.