Víkingur Reykjavík getur orðið fyrsta liðið í karlaflokki síðan árið 2011 til þess að vinna tvöfalt með því að bera sigur úr býtum gegn ÍA í bikarúrslitum karla á laugardaginn. Víkingar urðu Íslandsmeistarar þann 25. september síðastliðinn.
Tíu liðum hefur áður tekist að vinna tvöfalt í karlaflokki frá því að bikarkeppnin var sett á laggirnar árið 1960, það er að segja unnið bæði Íslandsmeistara- og bikarmeistaratitilinn.
Lið sem hafa orðið tvöfaldir meistarar í karlaflokki:
1961 – KR
1963 – KR
1976 – Valur
1983 – ÍA
1984 – ÍA
1993 – ÍA
1996 – ÍA
1998 – ÍBV
1999 – KR
2011 – KR
Víkingar hafa einnig titil að verja þar sem að þeir urðu bikarmeistarar árið 2019. Bikarkeppnin í fyrra var blásin af vegna kórónuveirufaraldursins og því eru Víkingar ríkjandi bikarmeistarar.
Það verður mikið um dýrðir á Laugardalsvellinum á laugardaginn er liðin mætast. Gamla stórveldið ÍA er á leið í sinn fyrsta bikarúrslitaleik síðan að liðið varð síðast bikarmeistari árið 2003.
Búist er við að rúmlega 6000 áhorfendur mæti á Laugardalsvöllinn á Laugardaginn.
Bikarkeppnin var sett á laggirnar árið 1960 og síðan þá hafa bæði félög unnið titilinn eftirsótta. Meiri sigurhefð er hjá ÍA en félagið hefur alls unnið bikarmeistaratitilinn í níu skipti. Víkingur Reykjavík hefur unnið titilinn í tvígang.
KR-ingar eru sigursælastir karlaliða í keppninni, alls hefur félagið unnið 14 bikarmeistaratitla og þó svo KR-ingar taki ekki þátt í úrslitaleiknum í ár munu þeir vona að Víkingar beri sigur úr býtum þar sem að það færir þeim Evrópusæti og miklar tekjur í bankann.
