Lögmaður Angjelins Sterkhaj, sem viðurkennir að hafa orðið Armando Bequirai að bana, segir aðspurður að mikilvæg atriði í vitnisburði aðalmeðferðar Rauðagerðismálsins í héraðsdómi hafi ekki ratað í fréttir fjölmiðla.
Bendir hann á að þó að flestir félaga Armandos heitins, sem tengjast öryggisþjónustufyrirtækinu Top Guard, hafi neitað því að hafa lagt sekt á Anton Kristin Þórarinsson, félaga Angelins, og hafi sagt að samræður á messenger-forritinu sem bentu til að slíkt væri í gangi hefðu verið grín, þá hefði einn mannanna viðurkennt að Armando hefði lagt sekt á Anton. Það þýði í raun að ákveðið hafi verið að þvinga fé út úr honum.
Þetta sé mikilvægt atriði sem styðji framburð Angjelins um að honum hafi staðið ógn af Armando og mönnum hans þar sem þeir hafi viljað að Angjelin hjálpaði sér við að kúga fé út úr Antoni Kristni og þegar hann neitaði að gera það hafi þeir viljað ryðja Angjelin úr vegi.
Þá bendir Oddgeir á að vitnaleiðslur á miðvikudag hafi leitt í ljós að í símtali fimmtudagskvöldið 11. febrúar, tveimur dögum fyrir morðið á Armando, hafi Armando hótað að ganga frá Angjelin en Angjelin svarað því til að ef reynt yrði að drepa hann myndi hann snúast til varnar og skjóta á viðkomandi. Ranghermt hafi verið í fréttum að Angjelin hafi hótað að fyrra bragði, hann hafi í raun verið að svara Armando og vara við því að hann myndi verja sig ef reynt yrði að drepa hann.
Það hefur víða komið fram í fjölmiðlum, meðal annars í kvöldfréttum Stöðvar 2 á þriðjudagskvöld, að talið sé að fyrsta skot Angjelins hafi hæft Armando í bakið. Oddgeir bendir á að réttarmeinafræðingur hafi sagt skýrt svo frá að hann gæti ekki metið hvar fyrsta skotið hefði lent í Armando, aðeins að hann teldi að síðustu tvö skotin hefðu hæft hann í höfuðið. Þá væru mögulegar hreyfingar sem gerðu það erfitt fyrir að segja til um líkamsstöðu manna eða röð skotanna.
Þá bendir Oddgeir á að vinur Armandos hafi sagt, er hann bar vitni, að Armando hefði hagað sér furðulega síðasta mánuðinn og meðal annars hótað sér lífláti, og að vinir Armandos hefðu lagt til að hann færi í meðferð.
Oddgeir segir í samtali við DV að hann telji að það sé talsvert meira upplýst í málinu varðandi aðdraganda þess en fjallað hefur verið um og minnir á að lögreglan á höfuðborgarsvæðinu hafi greint frá því á blaðamannafundi í marsmánuði að hún teldi að Armando hefði haft tengsl við skipulagða brotastarfsemi. Farið verði yfir þessi atriði í munnlegum málflutningi en þau liggi öll fyrir í gögnum málsins.