Á Reddit-þræðinum r/Iceland þar sem hægt er að birta færslur um Ísland og það sem gerist hér á landi birtist ansi skondin færsla í gær.

Einn erlendur áhorfandi leiksins klóraði sér í kollinum þegar hann sá fána sem stuðningsmannasveit landsliðsins, Tólfan, var með. Á fánanum mátti sjá hinn fræga bleika fíl með strik yfir sér sem gefur í skyn að bleikir fílar séu ekki velkomnir.

Áhorfandinn vissi þó ekki að fáninn væri frá forvarnarstarfinu Bleiki fílinn sem stofnað var í Vestmannaeyjum í kringum Þjóðhátíð 2012. Hann hélt að fáninn væri til að vekja athygli á því að fílar væru bannaðir á Íslandi. „Hvers vegna eru fílar bannaðir á Íslandi?,“ spurði notandinn.

Fílar hafa líklegast aldrei stigið fót á Íslandi nema um sé að ræða FÍL, Félag íslenskra leikara og sviðslistafólks, eða málmfílinn sem var til sölu í Costco og stendur nú í vatninu í Húsdýragarðinum.

Færslan vakti mikla athygli og voru Íslendingar ekki lengi að svara manninum sem var svo undrandi yfir fánanum. „Þetta er lítið land. Það er einfaldlega ekki pláss,“ og „Það eru ekki fílar sem eru bannaðir. Bara bleikir fílar. Það er vegna þess að þeir stangast á við þjóðlega fagurfræði,“ voru meðal útskýringa sem Íslendingar létu manninn fá áður en honum var svarað með réttri ástæðu.

Fílar eru í útrýmingarhættu og ekki má flytja þá hingað til lands samkvæmt lögum.