Karlmaður var í dag handtekinn á annarri hæð í Smáralindinni. Eins og við er að búast á þessum tíma dags var margt fólk statt í Smáralindinni þegar handtakan átti sér stað og voru mörg vitni að henni. Einn sjónarvotturinn hafði samband við DV og lét vita af því sem fór fram.
Viðkomandi hafði ekki hugmynd um hvers vegna maðurinn var handtekinn en segir að hann hafi verið langt frá því að vera sáttur við handtökuna. „Maðurinn lét öllum illum látum og öskraði,“ segir þessi aðili í samtali við DV.
DV heyrði í starfsmönnum verslana í Smáralindinni en flestir sem ræddu við blaðamann sáu bara manninn vera leiddan í járnum. Það var þar til blaðamaður náði tali af starfsmanni í versluninni sem maðurinn var fyrir utan þegar hann var handtekinn.
„Hann kom ekkert inn í búðina okkar. Hann var bara tæklaður fyrir utan búðina okkar og þetta gerðist allt fyrir utan. Við lokuðum búðinni og allir starfsmennirnir fóru á bak við. Við vorum ekki hrædd, meira bara í sjokki,“ segir starfsmaður verslunarinnar.
Starfsmaðurinn útskýrði jafnframt fyrir blaðamanni hvers vegna versluninni var lokað: „Það kom svo vond lykt því gaurinn sem var tæklaður skeit á sig fyrir utan búðina og klíndi því á öryggisvörðinn sem tæklaði hann. Þannig það kom bara ógeðsleg lykt inn í búðina og við lokuðum þess vegna,“ segir starfsmaðurinn.
„Þetta var bara ógeðslegt, það var ástæðan fyrir því að allir fóru á bak við, bara út af lyktinni. Það voru bara slettur út um allt gólfið núna. Þetta var ógeðslegt. Löggan var að þrífa þetta eftir hann, bara vesen.“
