Íslenska karlalandsliðið gengur út á völl gegn Rúmeníu í kvöld án lykilmanna, misjafnar ástæður eru fyrir fjarveru þeirra en ásakanir um kynferðislegt ofbeldi, meiðsli, COVID-19 og fleira í þeim dúr eru ástæða þess að lið Íslands verður án lykilmanna.

Einn af þeim leikmönnum sem ekki tekur þátt í leiknum er Kolbeinn Sigþórsson sem hefur verið meinað að taka þátt í leiknum af Stjórn KSÍ. Stjórnin tók þá ákvörðun að banna Kolbeini að spila leikinn vegna viðtals sem Þórhildur Gyða Arnarsdóttir fór í á RÚV á föstudag. Þórhildur steig þar fram og sagði frá kæru sem hún lagði fram gegn Kolbeini árið 2017.

Þórhildur sakaði þar Kolbein um að leggja á sig hendur og beita sig kynferðislegu ofbeldi á skemmtistað í miðborg Reykjavíkur laugardagskvöld eitt í september það ár. Í viðtalinu við Þórhildi kom fram að Kolbeinn hefði játað sök og greitt miskabætur, sem samkvæmt heimildum DV námu nokkrum milljónum. Í yfirlýsingu Kolbeins sem hann sendi fjölmiðlum í gær hafnaði hann því að hafa beitt konurnar ofbeldi og að hann hafi nokkurntímann játað þau brot. Hann viðurkenndi þó ósæmilega hegðun og að hafa greitt konunum miskabætur.

Þá staðfesti talskona Stígamóta í gær að þeim hefði borist þriggja milljóna greiðsla frá Kolbeini sem væri hluti af samkomulagi Kolbeins við Þórhildi og aðra konu.

Þegar Kolbeinn var valinn í landsliðshópinn árið 2018 á nýjan leik var sambandinu tilkynnt um málið af föður Þórhildar, sem sjálfur hafði óskað eftir því við forsprakka KSÍ að trúnaðs yrði gætt um málið. Var Kolbeinn sendur heim úr verkefni liðsins í Bandaríkjunum en á þeim tíma var hann meiddur. Kolbeinn var ekki með á HM það sumarið vegna meiðsla en vera má að þetta máli hafi einnig haft áhrif á val Heimis Hallgrímssonar á þeim tíma.

Skömmu síðar eða 11. september árið 2018 var komið að endurkomu Kolbeins í landsliðið en hann hafði þá ekki spilað með liðinu í rúm tvö ár vegna meiðsla. Leikurinn fór fram í Belgíu í Þjóðadeildinni. Ísland tapaði þeim leik.

Síðan þá hefur Kolbeinn spilað 20 landsleiki fyrir liðið án þess að mál hans rataði í umræðuna eða að gerðar væru athugasemd við veru hans í landsliðinu. Þórhildur steig fram með sína sögu vegna umræðu um að KSÍ þaggaði niður ofbeldi. Guðni Bergsson formaður KSÍ sagði starfi sínu lausu vegna þeirra ásakana sem nú eru uppi um vinnubrögð KSÍ og hegðun landsliðsmannanna. Þá sagði stjórnin af sér skömmu síðar og Klara Bjartmarz framkvæmdastjóri fór í leyfi.

Leikirnir sem Kolbeinn lék frá þeim tíma sem hann náði sáttum við Þórhildi og þangað til málið rataði í fjölmiðla eru hér að neðan: