Heimir Hallgrímsson fyrrum landsliðsþjálfari Íslands í knattspyrnu segist sorgmæddur yfir þeim fréttum sem verið hafa í gangi síðustu daga. Um þetta er fjallað í ítarlegu viðtali við Vísir.is

Þungar ásakanir hafa verið bornar fram á nokkra nokkra landsliðsmenn Íslands síðustu daga. Eitt málið hefur verið opinbert en það fjallar um atvik Kolbeins Sigþórssonar og Þórhildar Gyðu Arnarsdóttur. Kolbeinn greiddi miskabætur til Þórhildar en hafnar því að hafa brotið á henni eins og kom fram í yfirlýsingu hans í gær. Þórhildur heldur því fram að Kolbeinn hafi áreitt sig kynferðislega og tekið sig hálstaki.

„Ég er auðvitað bara eins og allir aðrir ofboðslega leiður og sorgmæddur yfir þessu öllu saman. Öll mín samskipti og kynni af þessum strákum hafa verið af góðu einu,“ segir Heimir sem stýrði íslenska landsliðinu á Evrópumótinu og Heimsmeistaramótinu við Vísir.is. Hann lét af störfum sumarið 2018.

Heimir kveðst eiga erfitt með að trúa þeim þungu ásökunum sem bornar eru á leikmenn liðsins. „Þetta er fyrst og fremst leiðinlegt og í öðru lagi á ég erfitt með að trúa þessu, einfaldlega vegna þess að ég hef unnið með þessum strákum í það langan tíma og ég hef ekkert nema gott um þá að segja. Þetta kemur mér jafnmikið á óvart og öllum öðrum,“ segir Heimir.

Heimir ætlar ekki að rengja það sem konurnar hafa að segja en segir. „Ekki að ég ætli að rengja þá upplifun sem þessar konur hafa. Ég á bara erfitt með að trúa þessu,“ segir Heimir við Vísir.is.