Stuðningsmenn Gautaborgar í Svíþjóð hengdu upp borða á æfingasvæði félagsins í morgun þar sem kom fram þeir vilji að félagið rifti samningi við Kolbein Sigþórsson. Ástæðan eru fréttir af málefnum hans og Þórhildar Gyðu Arnarsdóttir. Fótbolti.net fjallar um málið.

Kolbeinn greiddi Þórhildi miskabætur eftir atvik þeirra á milli skemmtistað í Reykjavík árið 2017. Þórhildur hafði haldið fram við RÚV að Kolbeinn hefði játað ofbeldi gegn sér en í yfirlýsingu sinni í gær hafnaði hann því.

„Ég kannaðist ekki við að hafa áreitt þær eða beitt ofbeldi og neitaði sök. Hegðun mín var hins vegar ekki til fyrirmyndar og baðst ég afsökunar á henni. Ég iðraðist og tók á því ábyrgð og var tilbúinn að leita sátta. Þær höfðu uppi kröfu um afsökunarbeiðni og greiðslu sem ég féllst á. Auk þess greiddi ég 3 milljónir króna til samtakanna Stígamóta og studdi þannig mikilvæga baráttu samtakanna gegn kynferðisofbeldi,“ sagði Kolbeinn í yfirlýsingu.

Þórhildur sagði í viðtali á RÚV að Kolbeinn hefði tekið sig hálstaki og áreitt sig kynferðislega. Málið hefur ratað í sænska fjölmiðla og stuðningsmenn Gautaborgar fóru á æfingasvæði félagsins og hengdu upp borða sem þess er krafist að samningi við Kolbeinn verði rift.

Í yfirlýsingu sagði Kolbeinn einnig. „Ég harma mína hegðun á þessum tíma og tek harða afstöðu gegn hvers kyns ofbeldi. Ég er enn markvisst að vinna í mínum málum. “

Bilder från Kamratgården.

📸 Ultras Göteborg pic.twitter.com/u1OXA6UN18

— David Vukovic (@DaVukovic) September 2, 2021