Greg Abbott, ríkisstjóri í Texas, er smitaður af kórónuveirunni og er nú í einangrun. Embætti hans skýrði frá þessu í gærkvöldi. Abbott, sem er Repúblikani, var bólusettur gegn veirunni á síðasta ári. Hann er sagður við góða heilsu og sýni engin einkenni smits.

Eiginkona hans greindist ekki með smit og þeim sem hafa umgengist Abbott að undanförnu hefur verið tilkynnt um málið.

Sjúkrahús í Texas eru undir miklu álagi vegna faraldursins og eru við það að láta undan álagi en þar liggja nú rúmlega 12.000 manns sem eru með COVID-19.

Abbott greindist með veiruna degi eftir að hann birti mynd af sér, án andlitsgrímu, á samkomu innanhúss í Dallas. Með honum á myndinni eru aðrir Repúblikana og eru þeir sömuleiðis ekki með andlitsgrímur.

Abbott er ekki hlynntur sóttvarnaaðgerðum og hefur meðal annars bannað skólayfirvöldum í ríkinu að krefjast þess að nemendum og starfsfólki verði gert að nota andlitsgrímur og hann hefur einnig bannað að fólk sé krafið um bólusetningarvottorð. Verslanir og veitingastaðir mega heldur ekki meina óbólusettu fólki aðgang.