Þrír leikir fóru fram í Pepsi Max-deild kvenna í kvöld. Leikið var í 14. umferð.
Þór/KA 1-0 Tindastóll
Þór/KA tók á móti Tindastól á SaltPay-vellinum á Akureyri. Heimakonur fóru með mikilvægan sigur af hólmi.
Karen María Sigurgeirsdóttir skoraði eina mark leiksins á 19. mínútu.
Í blálokin fékk Shaina Faiena Ashouri tækifæri til að tvöfalda forystu Þór/KA af vítapunktinum en allt kom fyrir ekki.
Það kom þó ekki að sök. Lokatölur 1-0.
Þór/KA er í sjötta sæti deildarinnar með 18 stig. Tindastóll er á botninum með 11 stig, þó aðeins stigi frá öruggu sæti.
ÍBV 1-2 Keflavík
Keflavík heimsótti ÍBV til Vestmannaeyja og vann mikilvægan sigur í fallbaráttunni.
Birta Hallgrímsdóttir kom gestunum yfir á 10. mínútu.
Snemma í seinni hálfleik varð Guðný Geirsdóttir, leikmaður ÍBV, fyrir því óláni að setja boltann í eigið mark. Keflavík komið í 0-2.
Um stundarfjórðungi síðar fékk Guðný svo að líta rauða spjaldið.
Manni færri tókst Eyjakonum að minnka muninn á 72. mínútu. Þá skoraði Þóra Björg Stefánsdóttir.
Nær komust þær þó ekki. Lokatölur 1-2.
ÍBV er í sjöunda sæti deildarinnar með 16 stig. Keflavík er sæti neðar með 12 stig.
Þróttur 2-0 Stjarnan
Þróttur fór upp fyrir Stjörnuna í baráttunni um þriðja sæti með sigri á heimavelli.
Heimakonur komust yfir snemma í seinni hálfleik þegar Guða Kristín Gunnarsdóttir, leikmaður Stjörnunnar, gerði sjálfsmark.
Dani Rhodes kom Þrótti í 2-0 þegar tíu mínútur lifðu leiks. Þar við sat.
Þróttur er í þriðja sæti deildarinnar með 22 stig. Stjarnan er sæti neðar með 20 stig.
