Um 28% íbúa í aðildarríkjum ESB hafa ekki efni á að fara í viku frí. Þetta eru niðurstöður nýrrar rannsóknar sem samtök evrópskra stéttarfélaga kynntu fyrir nokkrum dögum. Hjá þeim, sem eru á barmi þess að teljast fátækir, eru það sex af hverjum tíu sem hafa ekki efni á viku fríi. Meðal þeirra eru milljónir láglaunafólks, ellilífeyrisþegar og atvinnulausir.

Fram kemur að á síðustu tíu árum hafi aðgengi fólks að sumarfríum aukist en meirihluti lágtekju fjölskyldna hafi samt sem áður ekki efni á að fara í frí.

Rannsóknin var unnin út frá gögnum frá Eurostat, tölfræðistofnun ESB.

Fólk telst vera í hættu á að fara undir fátæktarmörk ef tekjur þess eru undir 60% af miðgildi tekna í hverju ríki. Í Grikklandi eru 88,9% fólks í þessum hópi. Í Rúmeníu eru það 86,8%.