Þetta er meðal þess sem kemur fram í nýrri skýrslu frá Copernicus, sem er loftslagsstofnun ESB, en hún nefnist „European State of the Climate“ (Staða loftslagsmála í Evrópu).
Í skýrslunni er loftslagsþróun síðasta árs gerð skil. Samantha Burgess, einn skýrsluhöfunda, segir að dökk mynd sé dregin upp.
„Með hækkandi hita og útbreiddum gróðureldum og þurrkum er sönnunin ótvíræð: Loftslagsbreytingarnar eru ekki ógn í framtíðinni, þetta er raunveruleiki nútímans,“ segir hún í fréttatilkynningu.
Í skýrslunni kemur fram að 95% af evrópsku landsvæði var hlýrra 2025 en meðalhitinn var á árunum 1991 til 2020.
Jótlandspósturinn hefur eftir Sebastian Mernild, sem er loftslagsvísindamaður við Syddansk háskólann í Danmörku, að skýrslan sé áhyggjuefni.
„Séð með vísindalegum augum, þá er þetta enn ein skýrslan sem staðfestir allt það sem við vissum fyrir. Bara með nýjum tölum og nýjum afbrigðum og nýjum stigum,“ sagði hann og bætti við: „Það er áhyggjuefni að þetta gerist svona hratt og að við komumst upp á þessi stig.“
Hann sagði að það veki sérstaka athygli við lestur skýrslunnar að hitabylgjur hafi verið algengar í bæði sunnan- og norðanverðri Evrópu.
Síðasta ár var það hlýjasta frá upphafi mælinga í Noregi, Íslandi og Bretlandi og næst hlýjasta árið á Írlandi, Svíþjóð og Finnlandi.
Þegar litið er á heiminn í heild sinni, þá er hlýnunin hröðust á norðurheimskautasvæðinu, sérstaklega á Svalbarða.
„Mælingar í Longyearbyen sýna að hlýnunin þar er sjö sinnum hraðari en annars staðar í heiminum,“ sagði Mernild.
Hiti og þurrkar áttu sinn þátt í að stórir gróðureldar brutust út og ollu mikilli eyðileggingu, þeirri mestu sem vitað er um. Í allt brunnu 1.034.550 hektarar lands á síðasta ári.
Á móti var frekar lítið um atvik með mikilli úrkomu og flóðum miðað við undanfarin ár.
