Það getur verið mikill unaður að fá sér kalt sódavatn í erli dagsins. Það er svalandi og mörgum finnst það hressa þá vel við. Margir velja sódavatn í von um að það sé hollara en að drekka gosdrykk og að það geti hjálpað til við að halda aftur af hraðferð baðvogarinnar upp á við þegar stigið er á hana. En hefur sódavatnið, gosið því, einhver áhrif á líkamann?

ScienceDaily segir að miðað við rannsókn, sem var birt í BMJ Nutrition, Prevention & Health, geti kolsýrt vatn haft smávægileg áhrif á hvernig líkaminn tekst á við sykur.

Þegar líkaminn tekur kolsýruna upp, getur það breytt blóðinu örlítið og hugsanlega gert líkamann aðeins betri í að nota glúkósa.  En áhrifin eru ekki mikil. Það magn glúkósa, sem verður hugsanlega fyrir áhrifum, er svo lítið að það getur varla haft nein áhrif á þyngdartap.

Akira Takahashi, vísindamaður, segir að þyngdarstjórn byggist á að hafa stjórn á mataræðinu og að hreyfa sig. Það að drekka sódavatn breyti þessu ekki eitt og sér.

Vísindamenn segja að frekari rannsókna sé þörf á þessu sviði og að sódavatn geti verið hluti af heilbrigðum lífsstíl en sé ekki leiðin til þyngdartaps.