Heilinn verður fyrir áhrifum af því sem við gerum daglega. Verkefni, sem þarfnast skipulagningar og minnis, geta átt sinn þátt í að halda heilanum gangandi.

Þetta á sérstaklega við um verkefni þar sem þarf að hugsa nokkur skref fram í tímann.

Hreyfing gegnir einnig mikilvægu hlutverki. Í rannsókn, sem var birt í JAMA Network Open, kemur fram að sú hreyfing, sem við fáum í lífinu, getur tengst minni líkum á að fá elliglöp.

Mataræði skiptir einnig máli miðað við rannsókn, sem var birt í JAMA Neurology, en í henni kemur fram að það sé gott fyrir heilann ef við borðum lítið af ofurunnum matvælum.

Daglegar rútínur geta þvískipt sköpum fyrir bæði líkamlegt og andlegt heilbrigði. Að geta séð um sig í hinu daglega lífi skapar skýra ramma og getur stutt við starfsemi heilans.

Að vera virkur félagslega getur einnig skipt máli, að vera með öðru fólki og deila upplifunum með því getur haft jákvæð áhrif á vellíðan okkar.

En það er rétt að hafa í huga að rannsóknir á þessu sviði geta ekki sannað orsakir og afleiðingar.

Í stórri rannsókn, sem var birt í Journal of Epidemiol Community Health, voru daglegar venjur eldra fólks rannsakaðar og var fylgst með fólkinu í sex ár. Tæplega 11.000 Japanir tóku þátt í rannsókninni.

Niðurstöðurnar sýndu skýr tengsl á milli þess að elda mat heima hjá sér og minni hættu á að fá elliglöp. Bara það að elda mat einu sinni í viku dró úr líkunum á að fá elliglöp.