Í gær voru tíu ár liðin frá því að norski öfgahægrimaðurinn Anders Behring Breivik myrti 69 ungmenni á eyjunni Útey og 8 í sprengjutilræði í Osló. Margir þeirra sem lifðu hryllinginn á Útey af hafa fengið morðhótanir og hatursskilaboð.

Þetta kemur fram í nýrri rannsókn „Nasjonalt kunnskapssenter om vold og traumatisk stress“ (NKVTS).

VG skýrir frá þessu. Fram kemur að meðal eftirlifendanna sé Astrid Willa Eide Hoem en hún sá Breivik skjóta vini hennar til bana. „Þetta er mjög sorglegt en ég verð að segja að ég er ekki hissa því þetta hef ég heyrt síðustu tíu ár,“ sagði hún um niðurstöður rannsóknarinnar.

Þær sýna að tveir af hverjum þremur hafa fengið morðhótanir og hatursskilaboð eftir hryllinginn á Útey.

„Þeir sem voru drepnir eða limlestir eru föðurlandssvikarar.“

„Held að það hefði verið best fyrir okkur ef þið hefðuð verið áfram á Útey og hefðuð ekki lifað af. Synd að Breivik miðaði ekki betur.“

„Gættu þín – næst verð ég þarna með Magnum og þá munt þú deyja, svínið þitt.“

Svona hljóða sum þeirra skilaboða sem eftirlifendurnir hafa fengið.

Astrid, sem er núverandi formaður ungmennahreyfingar Verkamannaflokksins, sem stóð fyrir ferðinni til Úteyjar í júlí 2011, segir að flestir eftirlifenda haldi sig til hlés. „Margir halda að það séu bara þeir eftirlifendur sem koma mest fram í fjölmiðlum og tala um þetta sem fá svona skilaboð. En það er líka venjulegt fólk sem hefur rætt einu sinni við staðarfjölmiðla. Því berast einnig hatursskilaboð, morðhótanir og er áreitt,“ sagði hún.