Fréttablaðið skýrir frá þessu í dag. Ríkisstjórnin hefur ekki fengið nýjar tillögur um aðgerðir enn sem komið er, aðrar en þær sem voru ákveðnar á mánudaginn, en ráðherrarnir eru í daglegum samskiptum við sóttvarnayfirvöld.
„Ég held að fólk skilji mjög vel að það eru engin endanleg svör í þessum faraldri. En við erum auðvitað ekki á sama stað og við vorum í upphafi þriðju bylgju, þess vegna er ekki hægt að draga bara sömu aðgerðir upp úr poka,“ er haft eftir Katrínu sem vísaði til að búið sé að bólusetja hátt hlutfall þjóðarinnar og þannig sé staða Íslendinga ólík þeirri stöðu sem flest önnur ríki búa við.
„Við erum þannig að reyna það sem þjóð hvernig bóluefnin virka, en það fylgir því að vera fremstur í röðinni að enginn annar hefur neina forskrift fyrir okkur. Við þurfum sjálf að vega og meta stöðuna sem er það sem okkar góða vísindafólk er að gera,“ sagði hún einnig.
Hún sagði að fylgst sé með öðrum þjóðum þar sem bólusetningar hafa gengið vel og hvaða aðgerða þær grípa til og hvernig þær ganga.
