Pep Guardiola þjálfari Manchester City segir félagið hvorki hafa efni á að kaupa Harry Kane né Erling Haaland í sumar.  City hafa verið mikið orðaðir við Kane undanfarið en Tottenham höfnuðu 100 milljóna punda boði í leikmanninn á dögunum. Þeir bláklæddu eru einnig sagðir hafa áhuga á Erling Haaland en stjórn félagsins eru að leita að arftaka Sergio Aguero sem yfirgaf félagið í sumar og gekk til liðs við Barcelona.

Guardiola sagði í viðtali við Katalónsku sjónvarpsstöðina TV3 að það væri ómögulegt að kaupa framherja til að ganga í stað Aguero vegna áhrifa Covid faraldursins á fjárhagsstöðu félagsins.

„Við erum ekki að fara að kaupa neina framherja á þessu verði. Það er ómögulegt, við höfum ekki efni á því,“ sagði hann.

„Öll félög eru í basli fjárhagslega, við erum engin undantekning. Við erum með Gabriel Jesus og Ferran Torres sem hafa verið frábærir í þessari stöðu. Við erum með frábæra leikmenn í akademíunni og höfum oft spilað með falska níu. Það er ólíklegt að við kaupum framherja í sumar. “

Heimildir Sportsmail herma að City séu líklegir til að lenda Jack Grealish frá Aston Villa fyrir 100 milljónir punda um leið og þátttöku hans á EM 2020 með ensku landsliðinu lýkur.

Manchester City hefja titilvörnina á heimavelli Tottenham í London þann 15. ágúst og verður þá spennandi að sjá með hvoru liðinu Harry Kane leikur.